Volaris eta CENATRA elkarlanean

Volaris aerolinea merkeen Mexikoko enpresak eta “Transplanteen Zentro Nazionalak” elkarlanean sortutako kanpaina aztertuko dut. Kanpaina horren helburua organoen donazioa bultzatu eta garraioa erraztea da.

Mexiko organo transplante ugariko herrialdea da. "Transplanteen Zentro Nazionalak" (CENATRA) dioenez, herrialdean 19.923 pertsonek organo transplante baten beharra daukate. Izan ere, munduan zehar operazio horiek praktikatzen dituzten 84 herrialdeetatik Mexiko 18. postuan aurkitzen da. Gainera, kasu gehienetan organoen emailea bizirauteko beharrezkoa duen hartzailearengandik urruti aurkitzen da eta horrek prozesuan zailtasunak eragiten ditu. Hala, kilometro askotako distantzietarako garraio segurua ezinbestekoa bihurtzen da.

Datu horiek kontuan izanik, 2009an Volaris aerolinea merkeen Mexikoko enpresak CENATRArekin hitzarmen bat sinatu du. Hala, bizitzak salbatzeko asmoarekin ospitale eta garraioen arteko protokoloa sortu da. Bertan, inolako gasturik izango ez duten ehun, organo eta medikuen bidaiak egitea adostu dute (dohako garraioa).

Bizitzaren aldeko erantzukizun sozialeko ekimen hau 2009an Veronica Oliverak proposatutako ideiatik sortu da. Izan ere, enpresak urte horretan "Ponle tu nombre a un avion" kanpaina sortu zuen eta bertako irabazlea den Oliverak “hegazkin bat izango banu organoen bidaiarako erabiliko nuke” adierazpena egin zuen.

Ekimena bultzatzeko, hegazkinen enpresa hainbat kanalez baliatu da. Jendearengana iristeko eta albistearen berri emateko interneten duten presentzia handia aprobetxatu dute: Facebook, Twitter, Google+, Pinterest, Instagram eta Foursquare plataformak erabiliz. Bestalde, kausa solidarioa izateari esker prentsan eta telebistan publicity-a lortu dute.

Amaitzeko, ekimena aproposa dela eta emaitza paregabeak eman dituela esan beharra dago. Emaitzek kanpaina arrakastatsua izatea eragin dute; oraingoz Volaris hegazkinen doako bidaiei esker, 121 organo eta ehun garraiatu baitira. Horregatik, gizartearen aldeko proiektuak egitea beharrezkoa dela uste dut, denengan pentsatu eta esparru handi zein txikietan besteei lagunduz. Bestalde, erantzukizun sozialeko ekintza honek Volaris enpresari irudi ona eraikitzen laguntzen dio.

Emma Watson arropa sostengarria

Jakina da pertsonaia ospetsuek beraien irudia landu eta publikoaren iritzi positiboa lortzeko gogor jarduten dutela. Nazioartean ezaguna den Emma Watson aktore famatua horren adibidea da.

Watson "Harry Potter" sagaren filmetan Hermione gaztearen papera egiteagatik da ezagun eta horrek hainbat ate ireki dizkio. "Time" aldizkariak 2015ean egindako "Eragin handiko 100 pertsonen" zerrendan gehitu zuen eta ONU erakundearen "Borondate Onaren enbaxadorea" da.

Egun, kausa sozialen mesedetan ekintzak sortu eta horietan parte hartzeagatik fama ona dauka. Gehienetan emakume eta gizonen alde egindako kanpainen protagonista izan bada ere, oraingo honetan ingurumenean oinarritu da. Aurrekari bezala, 2013an "People Tree" markarekin elkarlanean jardun eta ingurugiroarekin begirunezkoa zen arropa linea sortu zuen.

Okasio honetan, moda industriaren produkzioan eredu sostengarri bat bultzatzen duen "The Green Carpet Challenge" erakundearekin bat egin du. Ekimenaren helburua diseinatzaileei ingurugiroarekin adeitsuak diren jantziak sortu eta alfonbra gorrian erabiltzera animatzea da. Hortaz, modu etiko, ekologiko eta sostengarri batean sortutako arropaz janztera bultzatzen duen kanpaina da. Hala, modaren industriak gizartean eta ingurumenean eragindako inpaktua ekidin eta saldutako arropen irabaziak herrialde pobreenetako nekazari zein eskulangileentzako izango dira.

Proiektuari eusteko kanal desberdinak erabili dira: internet eta euskarri tradizionalak (telebista eta prentsa). Watsonek bere instagram kontu ofizialean natura errespetatuz sortutako arropekin egindako look-en argazkiak igo eta nola izan diren ekoiztuak azaltzen du. Aipagarria da, "Regreseion" filmaren aurkezpena aprobetxatuz prentsaren aurrean ekimen honen garrantziaz jarduteak eta gizarte intereseko ekintza bat izateak publicity-a (prentsan eta telebistan) lortzea eragin dutela.

Azkenik, kanpainaren ideia eta aurrera eramateko modua egokiak direla uste dut. Izan ere, bi aldeek (Emma Watson eta "The Green Carpet Challenge" erakundea) irabazten dute. Alde batetik, Watsonek bere ospeaz baliatuz, kanpainari indarra gehitzen dio eta horri esker, jendartean ezaguna egitea lortzen du. Bestalde, aktoreak bere irudia hobetzea eragiten du. Gizarteaz eta ingurugiroaz arduratzen dela ematen du, horrela bere irudia onuragarria izaten jarraituz.

"Human World"

Hainbat dira munduan zehar animalien defentsan egiten diren ekintzak eta erakundeak. Izan ere, animalien aurkako tratu txarrak ematen dira eta horren aurkako kanpaina proposatzen du Rémi Gaillardek.

Rémi Gaillard zuzendari eta umorista frantsesa txantxen sketchak internetera igotzeagatik da internazionalki ezaguna. Era askotako bideoak igotzen ditu eta okasio honetan egindako sketchak gizarteari gogoeta egitera bultzatzen dio.

Frantzian Ingurumen eta Baliabide Naturalen Idazkaritzak (SEMARNAT)  urte hasieran itsasoko edozein animalia ikuskizun ibiltarietarako erabiltzea debekatu zuen. Horren helburua animalien bizitza hobetzea eta kondizio penagarrietan egiten diren lekualdaketak ez sufritzea zen.

Aurrekari hori baliatuz, Gallardek “Human World” izeneko kanpaina sortu zuen. Kanpainaren bideoa Montpellier Frantziako hirian grabatuta dago eta helburua hiritarrei gatibutasunean bizi diren animalien egoeraz kontzientziatzea da; alderantzikako mundu batez baliatuz.

Proposatutako mundu horretan, jendea ikuskizun bihurtzen da. Hori lortzeko, Gaillard eta beste bi lagun kaleetatik bale urdin, izurde eta orkaz mozorroturik hiritarrei argazkiak zein bideoak atera, arrantzatu edota janaria ematen diete. Hala, hausnartzera gonbita egin eta animaliei gizakiok ematen diegun tratua salatzen du.

Umoristak kanpaina iragartzeko sare sozialen euskarria erabiltzen du. Internet da Gaillardek aukeratutako tresna eta horri esker, emaitza onak lortu ditu. Hain zuzen ere, bideoa biral bihurtu eta publikoaren onarpena izan du. Horrela, bideoa jende askok ikusia eta Facebook, Twitter edota beste sare sozialen bitartez partekatua izan da.

Nire iritziz, “Human World” kanpainak indar handia du. Gaillardek bideoa egiterakoan, adin eta klase sozial desberdinetako jendean pentsatu duela uste dut. Izan ere, ez du publiko zehatz baten perfila zehazten, animalien aurka egiten diren tratu txarrak ekiditea guztion betebeharra baita. Gainera, bideo dibertigarri baten bitartez, mezua era argian azaltzen du; edonork uler dezan. Beraz, rolak aldatuz eta jendeak animaliek bizi dutena sentiaraziz kontzientziatzea errazagoa da.

Komunikazio aholkulariak eta kazetariak

AEBtako Lanbide Estatistiken Bulegoak 2013an egindako ikerketa batean azaltzen denez, komunikazio aholkulariak kazetariei partida irabazten ari dira. Izan ere, 2013an kazetarien soldatak batezbeste urteko 35.600dolarretara jaitsi eta komunikazio kontsultarienak 54.940 dolarretara igo ziren. Gainera, komunikazio eta harreman publikoen langileen eskaria handitu egin zen, hots, AEBtan kazetari bakoitzeko 5 kontsultari izanik. 

Españako egoera antzekoa da. Komunikazio aholkulari profesionalen %39,4ak batezbeste urteko 30.000-60.000 euro bitarteko ordainsaria jasotzen duen bitartean, komunikazio hedabide batean lan egiten dutenak dira gutxien ordainduak (batazbeste urteko 26.359euro).

Albistea ikusgai hemen

Testu honetan, egun komunikazioaren esparruak lan munduan bizi duen egoera azaltzen da. Prnoticias interneteko webgunean argitaratutako albiste hau komunikazioa interesatzen zaien irakurleei zuzenduta dago.

Nire iritziz, informazioa ematerakoan datu ugari eskaintzeak albisteari aberastasuna eta sinesgarritasuna ematen dio. Izan ere, azaldutako datuak iturri desberdinetatik eskuratuak dira: Wellcomm II.Txostena, Europako Komunikazio eta Harreman Publikoen Edukazio eta Ikasketen Elkartea, Europako Komunikazio Zuzendarien Elkartea eta AEBtako Lanbide Estatistiken Bulegoa. Horrela informazioa kontrastatua eta egiazkoa dela argi usten du.

Aipagarria da,  albistea aldi berean ona eta arriskutsua dela. Alde batetik, komunikazio kontsultarien lanbideak duen oparotasuna berri ikaragarria da. Soldatak handiagotzeak eta profesionalen eskariak pozten nauen arren, kazetaritzak bizi duen uneak ikaratzen nau. Kazetarien eskariak gutxiagotzea, esparruko langile asko langabezian izatea eragin du. Hala, kazetarien soldatak jaitsi eta finantzazioak behera egiteak, kazetaritzaren kalitatea kaltetzen duela iruditzen zait.

Laburbiltzeko, sektore berbereko langileen artean desberdintasun nabarmenak egotea kaltegarria dela pentsatzen dut. 

Facebook eta errefuxiatuak

Azken asteetan errefuxiatuen kanpamenduak pil-pilean dauden gaiak dira. Siriako egoerak inpaktu handia sortu du nazioarteko gizartean eta horretaz aprobetxatu da Mark Zuckerberg.

Mark Elliot Zuckerberg Facebooken asmatzailea izateagatik da mundialki famatua. Estatubatuar programatzaile eta enpresaburuak 2004an Harvard Unibertsitateko beste kide batzuekin batera Facebook sarea eratu zuen. Egun, mundu osoko pertsona aberatsenetarikoa da. Horregatik bere irudia zaintzea beharrezkoa eta ezinbestekoa da.

Hala, Facebookeko sortzaileak ONUren (Nazio Batuen Erakundea) kuartel orokorreko foro batean, munduko buruzagien aurrean, interneteko sarbidea "giza eskubidea" zela babestu zuen. Beraz, Zuckerbergek Nazio Batuen Erakundearekin batera, errefuxiatuen kanpamenduetara interneteko konexioa eramanez kolaboratu nahi zuela argudiatu zuen. 

Ekintza horren helburua ez zen altruismo soila, guztiaren atzean bere enpresaren irudi positiboa mantentzea baitzegoen. Beti egin duen bezala, gizartearen gaitzekiko interesa zuela eta munduko jendeaz arduratzen zenaren ideia zabaldu nahi zuen; bera eta bere enpresa solidarioak zirela erakutsiz. Gainera, interneteko erabiltzaileak handitzeak, teknologia enpresek eskainitako zerbitzuak jende gehiagok erabiltzea ekarri eta horri esker onurak ugarituko ziren.

Ekintza iragartzeko kanal desberdinez baliatu ziren. Alde batetik, prentsaurrekoa eta interneteko euskarria erabili zuten. Bestalde, gizarte intereseko eta ekintza solidario bat aurrera eramateak publicity-a (prentsa idatzian zein telebistan) izatea eragin zuen. Laburbiltzeko, sortutako kanpaina gerra errefuxiatuei doako konexioa eskainiko zien proiektua aurrera eramatea zen; Internet ahalik eta jende gehienarengana iritsiz. 

Nire ustez, Facebooken komunikazioa oso ona da, beraien helburua lortzen dutelako. Kanpaina desberdinen bitartez jende gehiengoarengana iritsi eta irudi onuragarria mantentzen dute. Izan ere, lantzen dituzten eginkizun desberdinei esker publicitya eskuratzen dute. 

"Jugueterias de luto"

UNICEF (Haurren Laguntzarako Nazio Batuen Funtsa) 1950ean Nazio Batuen Erakundeko Batzar Nagusiak sortutako erakundea da. Erakundearen sorreratik hainbat kanpaina egin dituzte; 2014an Oniria7TBWA eta Viento Sur agentzien elkarlanarekin UNICEF Paraguayk “Jugueterias de luto” kanpaina sortu zuen.

Paraguayn egunero batezbeste lau jaioberri hiltzen zirela jakinez, egitasmoa aurrera eramatea pentsatu zuten. Proposatu zuten kanpainaren helburua osasun zerbitzuen egoera hobetu eta horrela saihestu daitezkeen emakume zein jaioberrien heriotzak ekiditea zen.

Mezua zabaltzeko, Asuncion hiriburuko hainbat jostailu-dendako erakusleihoak doluz jantzi zituzten. Beltzez jantzitako jostailuez gain,"jaioberri batek bizitza aldatzen dizu, bere heriotzak ere" mezua jartzen zuen. Hala, hedapen handiena lortzeko sare sozialetan #CeroMuertesEvitables hashtag-a erabiltzea proposatzen zen.

Amaitzeko, kanpainak emaitza ikaragarriak izan zituen; biral bihurtu eta gizartean inpaktu handia lortuz. Doluzko jostailu- dendak albiste izan ziren euskarri desberdinetan (telebista, irrati, internet eta prentsa). Horrela, gobernuei presioa egin eta ondorioz osasun zerbitzuen aurrekontua igotzea lortu zuten. Izan ere, ospitaleentzat ginekologo zein pediatra gehiago kontratatzeaz gain, teknologia berrietan inbertitu zuten. Bestalde, Nazio Batuen agentziak bidalitako txosten batean ageri zenez: Paraguayn amen eta jaioberrien heriotzak %30ean gutxitu ziren.

Beldur Barik

http://beldurbarik.org/

Beldur Barik programa 2009an sortu zen. Hasiera batean Berdinsarearen, hots, emakumeenganako indarkeriaren kontrako eta berdintasunaren aldeko udalen sareak jarri zuen abian. Orain aldiz, hainbat administrazio lokalen laguntzaz jarraitzen du aurrera. Alde batetik, Berdinsarea- Eudelen eta Araba, Gipuzkoa eta Bizikaiako Foru Aldundiaren bultzadarekin, Emakunde-Emakumearen Euskal Erakundeak antolatzen du. Bestalde, Euskal Herriko Unibertsitatearen, EITB-ren eta Eusko Jaurlaritzako Hezkuntza Sailaren laguntza ere badauka.

Beldur Barik indarkeriaren aurka egitea xede duen kanpaina da. Programaren helburua herritarren kontzientziazioa eta inplikazioa bilatzea da; publikoak aktiboki parte hartzea, ikus-entzunezkoak egin eta web orrialdean elkarbanatuz. Hala, webgunean sexismoaren aurkako eduki eta ekimenak aurkitzen dira. Horretarako, orrialdea atal desberdinetan banatuta dago: gaia, parte-hartu, ekimenak, lehiaketa, topaketa, zure herria eta kontaktua.

Lehiaketan parte-hartzaileek eginiko ikus-entzunezko lanak azaltzen dira. Bertan, lehenengo ediziotik, hau da, 2010. urtetik orain arte izandako filmen bilduma ageri da. Gainera, txapelketako sariak banatzeko jaialdia antolatzen da eta bertan antzerki, kontzertu, tailer eta bestelako hainbat ekintza aurkitzen dira.



Aipagarria da, kanpainak interneten duen presentzia, jendearengana iristeko twitter, facebook edota youtube bezalako kanalak darabiltza.

Amaitzeko, kanpaina ona dela esan beharra dago. Izan ere, modu sinple batean jendearen arreta deitu eta parte-hartzea eragiten du. Horrela, portaera zein eraso sexistak salatu eta egoeraren gogoeta eraginez. Berdintasuna bizitzako esparru guztietara heltzea ezinbestekoa da eta horregatik mota honetako ekintzak bultzatu behar dira.

"The history of the war on Drugo"

1. Nortzuk bultzatzen dute egitasmo hau? Zer ordezkatzen dute?

Kanpaina hau “Global Comission On Drug Policy” (Droga Politikaren Komisioa) erakundeak bultzatzen du. Erakundea nazioarteko hainbat lehendakari ohik (Kolonbia, Polonia, Portugal, Mexiko, Txile, Brasil eta Suitza) eta Kofi Annan, Paul Volcker...bezalako jende garrantzitsuk osatzen dute. 3 minutuko film labur honen bitartez, Latinoamerikan drogekin duten arazoa laburbiltzen da; drogen aurkako gerra kontatzen baita. Latinoamerikako gobernuburuei zuzenduta dagoen egitasmo honek drogek sortzen duten biolentzia eta mafiekin amaitzea du helburu.

2. Zeintzuk dira iniziatiba honen aurrekariak?

Azken aldian, herrialdeak pairatzen duen egoera larriagotu egin da. Drogek sortutako biolentzia eta erailketak portzentaje handi batean gora egin duten arren, ez da arazo berria.

• Lehenengoz, UNGASSek (Nazio Batuen Drogen Kontrol institutua) 1998an “mundo libre de drogas” lemapean eginiko batzarra aurkitzen da.
• Ondoren, komisioak 2011an informe bat egin zuen eta bertan, drogen aurkako debekuak jartzea porrot egitea zela azaltzen zuen. Gainera, sustantzien debekuen alorrean erreforma esanguratsuak proposatu zituen.
• 2012ko apirilean egindako “Cumbre de las Americas” konferentziaren  eztabaida nagusia aurreko urtean proposatutako erreformak izan ziren.
• Amerikako Estatuen Organizazioak 2013ko maiatzean Estatuko buruzagiek eskatuta txosten bat egin zuen. Bertan, drogen legalizazioa politika aukeratzat jotzen zen.

3. Zein da bideoaren helburua?

Bideoaren helburuak esparru asko hartzen ditu. Lehendabizi, Drogen Politika Globalean aldaketak lortzea du xede. Arazoari aurre egiteko, kontsumoa despenalizatu beharra dagoela esaten du, hots, kontsumoa zigortzeak ez duela ezer konpontzen argudiatuz. Horretarako, gizarteak drogak “ tabu” bezala ikusteari utzi eta osasun arazo bezala ikustea lortu nahi dute.

Bestalde, narkotrafikoarekin eta krimen organizatuarekin amaitzeko aukera bezala drogen erregulazio legal arduratsua proposatzen dute. Hala, drogek sortzen dituzten kostu sozialak, biolentzia, negozio, ustelkeria eta gobernu askoren ezegonkortasunarekin bukatuz.

Laburbilduz, helburua drogen merkaturatzea eta produkzioa kontrolatu eta horrela gizartean sortutako kalteak gutxiagotzea da. Biolentzia gutxiagoko gizarte bat lortzea posible dela azpimarratzen da.

4. Nori dago zuzenduta?

Bideoa organizazio internazionalei zuzenduta dago, horiek baitira legeak egiteko boterea daukatenak. Baina, herritarrei ere zuzenduta dagoela esan daiteke, ikusleak kontzientziatu eta gizartean dagoen drogekiko ikuspuntua aldatzeko.

5. Zeintzuk dira bideoaren gai nagusiak?

Gai nagusia Latinoamerikako gizartean dagoen drogen arazoa konpontzea da. Baina arazoa ezabatzea ezinezkoa denez, modelo berriak proposatzen dira, hots, sustantzien erabilera arduratsu eta kontrolatua. Horrela, drogek sortu duten biolentziazko egoera amaituko da.

6. Teknikoki zein da bideoaren balorazioa:

Bideoak originaltasun ukitua du; Gizartean dagoen arazo larri bat kontatzeko Erdi Arora eramaten gaituen maitagarrien ipuin bat kontatzen digu. Ipuinen bidez gauzak kontatzera ohitu gara eta horrek narrazioa errazten du. Beraz, ideiak eta egitasmoaren helburuak era argi eta ulergarrian azaltzen dira.

Bestalde, Ipuina kontatzeko eran, errekurtso literarioen erabilera azpimarratu dezakegu. Pertsonifikazioa aurki dezakegu, hots, Drugo izeneko dragoiaren bitartez drogaren kontzeptua ordezkatzen da.

Edukiaren egokitasunari erreparatuz, marrazkien erabilerak kontakizunari sinpletasuna ematen dio. Benetako irudiak erabiliko balituzte, gogorregia izango litzateke eta zenbait pertsonek ikusteari utziko liokete. Gainera, drogen kanpaina ohikoa ez izateak deigarri egiten da.

7. Nola baloratzen duzu bideoa?

Bideo ona dela uste dut, bere xedea betetzen baitu. Izan ere, ikusleak lehen minututik amaieraraino ikustea lortzen du, bidalitako mezua bereganatuz. Hala eta guztiz ere, norbaitek gaiaren inguruan zalantza izango balu, amaieran ematen den esaldiak dena laburbiltzen dio: “Un mundo sin drogas puede ser una utopía, pero uno con menos violencia y sufrimiento puede ser real”.

8. Egitasmoaren testuingurua. politikoa, ekonomikoa eta soziala

Ezer baino lehen jakin beharra dago, trafikanteek drogen merkaturatze ziur eta merkea ekoiztearen konfiantza izateko gobernuko funtzionarioak, politikariak eta ejertzitoa kontrolatzen dituztela. Narkotrafikatzaileak produkzio eta zirkulaziorako azpiegitura ekonomiko baxua duten esparruetan, hots, Estatu ahuletan kokatzen dira.

Beraz, Latinoamerika munduan kontsumitzen diren drogen ekoizle nagusia da. Nazio Batuen Erakundearen esanetan, azken urteetan, drogen ekoizpena ugaritu egin da: Kokainaren ekoizpena Kolonbia eta Perun; Mexiko, Guatemala, Kolonbia eta Perun mitxoletarena (beharrezko osagaia opioa eta heroina egiteko). Bestalde, Mexiko, Bolibia, Kolonbia eta Paraguay dira cannabis ekoizle nagusiak.

Bertan, gehien kontsumitzen diren sustantzia ilegalak cannabisa eta kokaina dira. Heroinak indar handia dauka Mexiko iparraldean eta Kolonbian. Gainera, saltzen diren sustantzien kalitatea prezioaren araberakoa da, hots, materia merkeagoa bada osasunarentzat kaltegarriagoa izango da. Horretarako, droga gasolina, azetona edota beste kimiko batzuekin nahasten da.

Betidanik drogen inguruko legeak Estatu Batuek inposatu dituzte. Lege horiek mugimendu ugariko tokien debeku, militarizazio eta oztopatzean oinarritu dira. Aldiz, azkenaldian, Hego Ameriketako herrialdeak aldaketak bilatzeko asmoz, arazoari aurre egiteko era berriak probatzen hasi dira. 

Alde batetik, herrialde askotan, drogak lantzen dituzten nekazarien eta kontsumitzaileen Giza Eskubideak ez dira errespetatzen (polizien tortura eta tratu txarrak, hilketak, kartzelatzeak...). Gainera, drogen merkatua biolentzia eta erailketekin estuki lotua dago eta horrek herrialde ekoizle zein zirkulaziokoei eragiten diela. Adibidez, 2006an Mexikon krimen organizatuaren aurka hasitako borrokak: 70.000 hildako, 25.000 desagertze derrigortu eta beldurrak sortutako milaka pertsonen lekualdaketa utzi zituen.

Bestalde, drogen munduak eraginda Latinoamerikako kartzelak jendez gainezka daude. Hala, baldintza jasangaitzen eta biolentzia askoz betetako kartzelak dira. Adibide bezala, azken hamarkadan Brasilen gatibuen biztanleria bikoiztu egin da 233.000tik 473.000arte (kartzelatze masiboa).

 

9. Aztertu zein da atzean dagoen komunikazio estrategia+ 10. Egin estrategia osoaren balorazio bat

Azkenik, kanpainako estrategia osoari balorazio positiboa egingo nioke. Izan ere, Latinoamerikako gizarteak pairatzen duen drogen arazoa azaldu eta jendea kontzientziatzea bilatzen du. Bizi duten errealitatearen azalpena modu ulergarri eta sinplean laburbiltzen da, jakinaren gainean ez dauden ikusleek uler dezaten.

Kanpaina egoeraren salaketa eraginkorra dela uste dut. Drogen negozioari esker batzuek poltsikoak diruz betetzen dituzten bitartean beste askoren bizitza jokoan dago. Hortaz, diru mordoa mugitzen duenez, askoren ogibide bilakatu da. Hala, herrialdeetan pairatzen den biolentzia, ustelkeria, beldurra eta osasun arazoen sortzailea bihurtuz.

Konponbide bezala, biolentzia gutxiagoko gizarte bat proposatzen dute eta hori da bideoak duen xedea. Bideoan diotenez, debekuak ez dira kontrolaren sinonimoak; debekuek kontrol eza dakarte. Debekuak merkatu ilegalaren boterea eta gaizkileen aberastasuna handitu du. Drogek sorturiko diruak ustelkeria eta gatazkak ekartzen ditu.

Beraz, ikusleari informazio gehiago bilatu eta gogoeta bat egitera animatzen dio, drogen legalizazioak gizartea hobetu dezakeela ohartaraziz. Hau da, legalizazioak aurrerakuntza soziala ekarriko luke: biztanleen lasaitasuna, osasun hobekuntza...

LOTURAK:

http://idpc.net/es/incidencia-politica/trabajo-regional/america-latina

http://www.countthecosts.org/es/los-siete-costos/socavando-el-desarrollo-y-la-seguridad-alimentando-el-conflicto